ठोक नुस्त्याची विक्री बंद जायना तो मेरेन विकतले नुस्तें
मार्केटांतल्या नुस्तें विक्रेत्यांनी घेतलो निर्णय
वास्को: जो मेरेन ठोक नुस्त्याची विक्री बंद जायना तो मेरेन आमी मुरगांव पालिका इमारती मुखा वयल्या रस्त्यारूच नुस्तें विकतले असो निर्णय मार्केटांतल्या नुस्तें विक्रेत्यांनी घेतलो. ठोक नुस्त्याची विक्री बंद करपा खातीर हांवें सगले तरेचे यत्न केले, पूण ते आयकनात. ताका लागून तांचे आड खर पावलां उबारचीं पडटलीं अशी शिटकावणी मुरगांवचे नगराध्यक्ष लिओ रॉड्रिगीश हांणी दिली.
ठोक नुस्तें विकपी तशेंच जाग्याजाग्यांनी रस्त्याचे कुशीक नुस्तें विकप्यां आड कारवाय करून त्या अवैध नुस्त्यांची विक्री बंद करची अशी मागणी मार्केटांतल्या नुस्तें विक्रेत्यां कडल्यान फाटल्या कांय म्हयन्यां सावन जायत आसा. ह्या प्रकरणांत मुरगांव पालिकेन संबंदीत ठोक नुस्तें विक्रेत्यां आड कारवाय केल्ली. पूण कारवाये उपरांत कांय दिसांनी थंय परतून ठोक नुस्तें विकप सुरूच आशिल्लें.
ह्या प्रकरणांत मुरगांव पालिकेन खर पावलां उबारचीं, नाजाल्यार आमी मुरगांव पालिका इमारती मुखार नुस्तें विकूं अशी शिटकावणी मार्केटांतल्या नुस्तें विक्रेत्यांनी दिल्ली. ताका लागून फाटल्या कांय दिसां सावन मुरगांव पालिकेन ठोस नुस्तें विक्रेत्यां आड कारवाय सुरू केल्ली. जाग्यगजाग्यांनी रस्त्याचे कुशीक नुस्त्याची विक्री करप्यां आड मुरगांव पालिका, वास्को पुलीस हांणी कारवाय करून संबंदीत बायलांक समज दिल्ली. पूण तीं बायलां आयकुपाचे मनस्थितींत नात. त्यो परतून रस्त्याचे कुशीक नुस्तें विकतात.
शिटकावणी दिवन लेगीत कांयच उपेग जायनाशिल्ल्यान मार्केटांतल्या नुस्तें विक्रेत्यांनी बुधवारा सकाळीं मार्केटांतलो वेव्हार बंद दवरून मुरगांव पालिका इमारती मुखार नुस्त्याची विक्री सुरू केली. ताका लागून वास्कोकारांच्यो वेगळ्योवेगळ्यो प्रक्रिया आयकूंक मेळ्ळ्यो.
खारीवाड्यार ठोक नुस्त्याची विक्री बंद जावची हे खातीर आमी तेन्नाचे आमदार कार्लुस आल्मेदा, सद्याचे आमदार कृष्णा साळकार हांचे कडेन मागणी केल्ली. पूण थंयची नुस्त्याची विक्री अजून बंद जाल्ली ना. नव्या मार्केट इमारतीचें बांदकाम सुरू करचें पयलीं आमी आमच्यो कांय अटी दवरिल्ल्यो. तातूंत ठोक नुस्तें विक्री बंद करची ही म्हत्वाची मागणी आशिल्ली. ती मान्य करपाचें आस्वासन दिल्लें. ताका लागून आमी तात्पुरते उबारिल्ले शेडींत नुस्तें विकपाक तयार जाले अशी म्हायती किस्तोद डिसोझा हांणी दिली.
पूण अजून ठोक नुस्तें तशेंच रस्त्याचे कुशीक जावपी नुस्त्याची विक्री बंद जाल्ली ना. ताका लागून आमी मुरगांव पालिकेक कांय दिसांची मुजत दिल्ली. तरी लेगीत नुस्त्याची विक्री बंद जावंक नाशिल्ल्यान आमी मुरगांव पालिका इमारती मुखार नुस्तें विकपाक सुरवात केली. जो मेरेन ठोक नुस्त्याची विक्री बंद जायना तो मेरेन आमी मार्केटांत नुस्तें विकनासतना रस्त्यारूच बसतले अशें तांणी स्पश्ट केलें.
ठोक नुस्तें विक्री आनी रस्त्याचे कुशीची नुस्तें विक्री बंद करपाचो आमी मना पसून यत्न करीत आसात. ठोक नुस्तें विक्री दुकानांक आमी कुलप लावपाचें काम हातांत घेतिल्ल्याचें नगराध्यक्ष लिओ रॉड्रिगीश हांणी सांगलें. रस्त्याचे कुशीक नुस्तें विक्री करप्यांक खारीवाडो फिशींग जेटीर नुस्तें विकतात. ते नुस्तें तांणी संबंदीत बायलांक विकचें न्हय. जाल्यारूच विवीध रस्त्याचे कुशीक जावपी नुस्त्याची विक्री बंद जातली अशें रॉड्रिगीश हांणी स्पश्ट केलें.