सुब्रह्मण्य भारती हें फकत महाकवीच न्हय, ते स्वतंत्र सेनानी आनी समाज सुधारकय आशिल्ले जांणी आपल्या लिखाणांतल्यान त्या वेळा वयल्या जाती-धर्माक धरून भौसांक मार्गदर्शन दिल्लें. जर आमची भाशा फुलपाक जाय आनी तिचें जतन जावपाक जाय जाल्यार दर एके व्यक्तीन असलो वावर आनी धडपड करपाक जाय अशें समाज सेविका आनी शिक्षिका सुलक्षणा सावंत हांणी सांगलें. तशेंच सुब्रह्मण्य भारती हांचे कवितेचें कडवें वाचून तिणें प्रेक्षकांचें लक्ष ओडून घेतलें. गोंय सरकाराच्या राजभाशा संचालनालयान कला, विज्ञान आनी वाणिज्य सरकारी म्हाविद्यालय, सांखळेच्या कोंकणी आनी हिन्दी विभागाच्या, तशेंच उच्च शिक्षण संचालनालयाच्या जोड पालवान महाकवी सुब्रह्मण्य भारती हांचे जयंती निमतान ‘भारतीय भाशा उत्सव’ ही कार्यावळ घडोवन हाडली. हे कार्यावळीच्या उक्तावण सुवाळ्याक भोवमानेस्त सुलक्षणा सांवत कार्यावळीची मुखेल सोयरी ह्या नात्यान उलयताली.
सरकारी म्हाविद्यालय, सांखळेचे प्राचार्य प्रो. (डॉ.) नामदेव गावस हांणी हे कार्यावळीची मुखेल सोयरी समाज सेविका सुलक्षणा सावंत, मानाचे सोयरे प्रसाद लोलयेकार, आय.ए.एस, गोंय राज्याचे शिक्षण सचीव, मूळस्वर उलोवपी विद्याप्रबोधिनी म्हाविद्यालयाचे प्राचार्य प्रो. (डॉ.) भूषण भावे, उच्च शिक्षण संचालनालयाचे संचालक भुषण सावयकार, तशेंच राजभाशा संचालनालयाचे संचालक प्रशांत शिरोडकर हांकां आनी सभाघरांत हाजीर आशिल्ल्या प्रेक्षकांक येवकार दिवन कार्यावळीची सुरवात केली. तशेंच दीप प्रज्वलन जाले उपरांत नागपूरची मराठी साहित्यीक नेहा भंडारकर लिखीत सुब्रह्मण्य भारती हांच्या जिविताचेर बरयिल्ले कवितेचें व्हिडियो प्रसारण जालें.
भाशा ही सगळ्या भारतीय भाशिकांची अभिव्यक्ती आशिल्ल्यान ताचें जतन आनी पसरण जावपाची गरज आसा. कोंकणी भाशेचीं विंगड विंगड तासां सांबाळून दवरपाक जाय आनी ताचें दस्तावेजीकरण जावपाक जाय अशें शिक्षण सचीव प्रसाद लोलयेकार, आय.ए.एस. हांणी आपल्या उलोवपांत सांगलें.
विद्यार्थी भाशेचे उपयोगते कडेन पळोवन भाशा विशय म्हूण शिकपाक उणें म्हत्व दितात, जाचो प्रभाव आमच्या गोंयच्या भाशांचेर जातात. तशेंच वेगवेगळ्या क्षेत्रांत भारतीय भाशांचें गिन्यान घेवन वावर करपाची गरज आसा अशें मूळस्वर उलोवपी प्रो. (डॉ.) भूषण भावे हांणी सांगलें. ज्या प्रमाणांत अस्तंती भाशा प्रगत जाल्ल्यो आसात, ते तुळेन भारतीय भाशा तितल्या प्रमाणांत प्रगत जाल्ल्यो पळोवपाक मेळना, हें सांगून सभाघरांत आशिल्ल्या प्रेक्षकांक मायभाशेचें म्हत्व तांणी पटोवन दिलें. गोंयच्या कोंकणी आनी मराठी भाशांतल्या कवितांचो इतिहास तशेंच वेंचीक कवींच्या लिखाणाची वळख तांणी करून दिली.
ताचे उपरांत आयोजीत केल्ल्या कवी संमेलनाचें अध्यक्षपद कवी गोपीनाथ गावस हांणी सांबाळ्ळें. ह्या संमेलनांत प्रो. (डॉ.) नामदेव गावस, सानिका बर्वे, शर्वाणी म्हैसकर, आनी कोमल चव्हाण हांणी गोंयच्या नामवंत कवींच्या कांय कवितांचें आनी महाकवी सुब्रह्मण्य भारती हांच्या कवितांचें सादरीकरण केलें. तशेंच सविता गिरोडकर, रामा पार्सेकार, अमेय किंजवडेकर आनी गीता झोरे हांणी मराठी, कोंकणी आनी हिन्दी भाशेंत स्वरचीत कवितांचें सादरीकरण केलें.
हे कार्यावळीचें सुत्रसंचालन कोंकणी विभागांतली सहाय्यक प्राध्यापक उर्वशी नायक आनी हिन्दी विभागांतले सहाय्यक प्राध्यापक सुविद्य धारवाडकार हांणी केलें. हे कार्यावळीचें उपकाराचें उलोवप राजभाशा संचालनालयाचे संचालक प्रशांत शिरोडकर हांणी केलें. हे कार्यावळीक राजभाशा संचालनालयाचे उपसंचालक अनिल ह. सावंत, भाशांतरकार स्नेहा सबनीस, म्हाविद्यालयाची उप-प्राचार्य डॉ. सोनिया सिरसाट हजर आशिल्लीं. हे कार्यावळीचो आस्वाद शिक्षक, शिक्षकेतर कर्मचारी, विद्यार्थी तशेंच साहित्यिकांनी घेतलो.